Соңғы тур: кім ел чемпионы атанады?

10 қараша күні OLIMPBET QFL Премьер-лигасының 26-шы тур ойындары бір мезетте өтіп, футболдан Қазақстан чемпионы анықталады. Осы орайда, шешуші тур ойындарына аңдатпаны ұсынамыз.

«Атырау» - «Қайрат»

Уақыты: 14:00

Тікелей эфир: Sport+ Qazaqstan телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: «Мұнайшы» стадионы (Атырау)

Төрешілер: Тевяшов Денис (Орал), Филипчук Евгений (Шымкент), Мыңбаев Әлішер (Қаратау)

VAR төреші: Чеховский Георгий (Астана)

AVAR төреші: Кучма Антон (Көкшетау)

Қосымша төреші: Сұлтанғалиев Руслан (Атырау)

Инспектор: Горда Александр (Көкшетау)

Чемпиондыққа таласта «Қайрат» 1 ұпай алда тұрғанымен, алматылықтарды соңғы турда өте қиын сынақ күтіп тұр. «Атырау» өз алаңында фавориттерге қарсы өте жақсы ойнайтынын барлығы біледі. Осы маусымда олар тек «Жетісуге» ғана есе жіберіп, ТОП-6-дағы барлық қарсыластарынан ұпай ала алды. Өз алаңындағы 6 матчта небәрі 6 гол ғана жіберген. «Қайрат» клубының шабуыл шебі өткір болғанымен, 1 гол соғудың өзі оңай болмайды. Алаң иелерінің турнир кестесінде ешқандай мотивациясы болмағанымен, шабуылшы Николай Сигневич үздік сұрмерген атағын жеңіп алуға өте жақын тұр. Жеке амбиция командаға да нәтижесін тигізіп қалар... Бұл «Қайраттың» сұрмергені Жоао Паулоға да қатысты.

«Астана» - «Жетісу»

Уақыты: 14:00

Тікелей эфир: Qazsport телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: «Хан Тәңірі» стадионы (Алматы қ.)

Төрешілер: Байымбет Сәкен (Тараз), Калачев Сергей (Атырау), Долгих Алексей (Павлодар) 

VAR төреші: Затула Александр (Өскемен)

AVAR төреші: Панин Максим (Қостанай)

Қосымша төреші: Шабанов Алексей (Алматы)

Инспектор: Қызылбаев Бақыт (Ақтөбе)

Чемпиондықтың тағдыры соңғы турда шешілетіндігі белгілі болды. «Астана» екінші орында келе жатса да, жеңімпаз атанып қалудан үміті бар. Ол үшін өз алаңында «Жетісуді» жеңіп, «Қайраттың» ұпай жоғалтқанын күту қажет. Елордалықтар бейсенбі күні Конференцияларлигасының жалпы кезеңінде «Пафосқа» қарсы өтетін ойынға тағы да қосалқы футболшыларын аттандырып, бар назары әлі де ішкі біріншілікте екенін аңғартты. Қайрат Нұрдәулетовтың шәкірттері турнир кестесінің төменгі бөлігінде жайғасқанымен, кімге болса да, қарсылық танытатынын бірнеше рет дәлелдеді. «Астанамен» осы маусымда өткен қос матчта да «Жетісу» соңғы минутқа дейін жалынды қарсылық танытып, алғашқы айналымда жеңіліс тапса, 1ХВЕТ QFL Лига кубогында сенсациялық 2:1 есебімен басым түсті. Алдағы матчта «Астана» айқын фаворит болғанымен, талдықорғандықтар оңайлықпен берісе қоймайтындығы түсінікті.

«Ақтөбе» - «Тұран»

Уақыты: 14:00

Тікелей эфир: Q Arena телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: Қобыланды батыр атындағы орталық стадион (Ақтөбе қ.)

Төрешілер: Сариев Болат (Орал), ТұрсымбаевТимур (Астана), Филатов Иван (Қарағанды)

VAR төреші: Құмашев Тимур (Астана)

AVAR төреші: Сорокопудова Татьяна (Қарағанды)

Қосымша төреші: Мортин Никита (Ақтөбе)

Инспектор: Цареградский Сергей (Алматы)

«Ақтөбе» клубы екі жыл қатарынан OLIMPBET QFL Премьер-лигасының қола жүлдесін алуға жақын тұр. Ол үшін өз алаңында «Тұранды» жеңсе жеткілікті. Түркістандықтарда ешқандай мотивация жоқ. Оның үстіне бұл ұжым кейінгі 3 түздегі кездесуде 10 гол өткізіп алды. Ал командалардың арасындағы матчтарда ақтөбеліктер көп жағдайда айласын асырып келеді. Маусымның соңғы ойыны Қобыланды батыр атындағы орталық стадионда өтетіндіктен, футболшылар өз жанкүйерлерін жарқын ойынымен қуантып, маусымды жақсы аяқтауға тырысатындары анық.

«Қайсар» - «Тобыл»

Уақыты: 14:00

Тікелей эфир: Q League телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: Ғани Мұратбаев атындағы стадион (Қызылорда қ.)

Төрешілер: Тасыбаев Айдын, Навроцкий Иван (екеуі де Астана), Мағау Наргис (Алматы)

VAR төреші: Омаров Рустам (Алматы)

AVAR төреші: Суликанов Саят (Ақтөбе)

Қосымша төреші: Жұмашев Нұржан (Қызылорда)

Инспектор: Құсайынов Елеш (Астана)

«Ордабасының» қатарынан үш мәрте жеңілуінен кейін «Тобылдың» аяқ астынан еурокубокқа деген үміті артып кетті. Енді Қызылордадағы кездесуде қара басып, жеңілмеуі керек. Барынша ірі есеппен жеңген қостанайлықтарға да пайдалы. Алдағы ойында «Тобыл» айқын фаворит болса да, бір қызығы осы маусымдағы екі кездесуде де «Қайсар» басым түскен. Виктор Кумыковтың шәкірттері өткен турда «Қызылжардан» ойсырай жеңілгенімен, ерте қағаздан сызып тастауға болмайды. «Тобыл» бұған дейін әлдеқайда мықты «Ордабасы» мен «Астананы» жеңіп, енді түзде есе жібермейтіні түсінікті. 

«Ордабасы» - «Елімай» 

Уақыты: 14:00

Тікелей эфир: Q Football мобильді қосымшасы, Sportplustv.kz, QFootball.kz, QFL.KZ сайттары

Өтетін жері: Қажымұқан Мұңайтпасов атындағы орталық стадион (Шымкент)

Төрешілер: Московченко Григорий (Павлодар),Виноградов Денис (Петропавл), Павлов Александр (Алматы)

VAR төреші: Гороховодацкий Сергей (Алматы)

AVAR төреші: Ноженко Сергей (Талдықоған)

Қосымша төреші: Халилов Муродбек (Шымкент)

Инспектор: Сламбеков Қайрат (Алматы)

Бірнеше тур бұрын «Ордабасы» мен «Елімай» турнир кестесінде көш бастап, чемпиондыққа үміткерлердің тізіміне кірген еді. Алайда қатарынан жеңіліске ұшыраған ұжымдар тіпті жүлделі орыннан да үміттерін үзуге жақын тұр. Көпшілік мамандар дәл осы теке-тірес маусымныңәдемі нүктесін қояды деп еді. Енді осы ойынның қорытындысы бойынша, жеңімпаз тіпті еурокубок жолдамасын да алмауы әбден мүмкін. Командалар осы маусымда ресми екі мәрте жолығып тең түскен. Бірақ осы жолы шымкенттіктерді тең есеп мүлдем қанағаттандырмайтындықтан, тек қайсыбір команданың жеңісін көріп қалуымыз әбден мүмкін.

«Жеңіс» - «Қызылжар»

Уақыты: 14:00

Тікелей эфир: Q Football мобильді қосымшасы, QFootball.kz пен QFL.KZ сайттары

Өтетін жері: Орталық стадион (Павлодар)

Төрешілер: Сахи Данияр (Қызылорда), Тергеусізов Самат (Алматы), Орынбаев Илашбек (Түркістанобл.)

VAR төреші: Нұрмустафина Эльвира (Алматы)

AVAR төреші: Филоненко Дмитрий (Тараз)

Қосымша төреші: Әлібеков Нұрсұлтан (Павлодар)

Инспектор: Салий Павел (Өскемен)

Турнир кестесінің 9 және 10-шы орындарында тұрған командалардың ойыны еш нәрсені өзгертпейтіні түсінікті. Еш қысымсыз доп теуіп жүрген командалар соңғы уақытта көпшілікті таңғалдырып, жеңіліссіз келе жатыр. Өткен турда «Қызылжар» қызылордалықтарды 6:2 есебімен жеңіп, маусымдағы ең көп гол соғылған матч ретінде тіркелді. Ал «Жеңіс» кейінгі 5 матчта да есе жібермей келе жатыр. Бұл 5 ойынның ішінде «Ордабасы» мен «Тобылдан» басым түсіп, «Астанамен» ұпай бөлісті. Алдағы ойындағы 3 ұпай «Жеңістің» турнир кестесінде «Қызылжарды» басым озуға көмектеседі. Бірінші матчта Әли Әлиевтің шәкірттері қарсыластарын 4:0 есебімен тас-талқан қылып, ұтқан.

Айта кетейік, OLIMPBET QFL Премьер-лига матчтарының көрсетілімі тарихында алғаш рет 10 қарашада Симулкаст болады! Соңғы 26-шы турдың мультитрансляциясы бір телеарнада ұсынылады. Футбол сүйер қауымға тікелей эфирде барлық 6 ойындағы басты оқиғалар, соғылған голдар, live-режимдегі турнир кестесі, сараптамалық материалдар, матчтардан қосылымдар ұсынылады. Ал, биылғы маусымды тікелей эфирде қорытындылайтын басты қонақ – Магомед Адиев!

Симулкаст 10 қараша күні, сағат 13:30-да Q Football телеарнасы, Qfootball.kz сайты мен Q Football мобильді қосымшасында басталады.Бағдарламаны келесі сілтеме арқылы тамашалауға болады.