Магомед Парагульгов: Жеңіске деген жігер танытып, «Астананы» ұтуға болады

02 наурыз 2018 10:11

2017 жылғы маусымда ашылған жаңа есімдердің бірі, «Қайрат» ФК жартылай қорғаушысы Магомед Парагульгов өз командасының даярлығы туралы және елордалық ұжымды қалай жеңуге болатындығы туралы сұхбат берді.

- Магомед, алматылық команданың маусымға деген дайындығын қалай бағалайсың?

- Дайындық қарқынды жүруде. Маусымның басталуына қарай оптимальды күйімізге жақындап қалдық. Физикалық, тактикалық және техникалық даярлықты пысықтаудамыз. Күннен күнге команданың ойыны жақсарып келе жатыр.

- ОЖЖ барысында «Қайраттың» ойын өрнегі қаншалық өзгеріске ұшырады?

- Ойын біршама жаңарды деп ойлаймын. Команданың жақсы жақтары да бар, жағымсыз жақтары да болды. Қателіктерді жоюға тырысудамыз. Менің ойымша, әр команданың ойын өрнегінде өзінің минустары болады.

- Жаңа маусымның Суперкубогы үшін «Астана» мен «Қайрат» таласпақ. Суперкубок аясында бұл кездесу алматылық және елордалық ұжымдардың төртінші ойыны болады. Алдағы матчтан не күтесіз?

- Менің ойымша, бұл ойын жанкүйерлер үшін өте маңызды. Аталған кездесуде жеңіске жетіп, жаңа маусымды жақсы көңіл-күймен бастауға болады. Бізде алға қойылған мақсаттар бар, оларды міндетті түрде орындауға тырысамыз.

- «Астананың» дайындық кезіндегі ойындарын қарауға мүмкіндік болды ма?

- Елордалықтардың тек еурокубоктардағы ойындарын қарай алдым, себебі бізде жаттығулардан тыс бос уақыт аз болды. Маусым басталғанша, әлі көп жұмыс жасалуы тиіс, сондықтан тек өз командамның дайындығына көңіл бөлемін.

- Қыста қос команда құрамдары жаңарды. Кабананга мен Гоудың чемпионаттан кетуі- біз үшін жағымсыз жаңалық. Сіздің пікіріңізше, бұл шабуылшылардың болмауы қос команданың нәтижелеріне және суперкубоктық ойынның нәтижесіне кесірін тигізуі мүмкін бе?

- Иә, әрине, кесірін тигізеді. Бірақ қос команда бұл ойыншылардың орнын басатын шеберлерді табуы тиіс. Бізді бұл мәселе алаңдатпайды. «Қайратқа» тиісті ойын өрнегін көрсетуді жоспарлап отырмыз.

- «Астананы» қалай ұтуға болады?

- Жеңіске деген құштарлық көрсетіп, қарсыластан басым түсуге ұмтыламыз. Кездесу біздің команданың жеңісімен аяқталады деп сенемін.