24-ші тур аңдатпасы: «Астана» кезекті чемпиондыққа үміткерді жеңе ме?
26-27 қазан күндері аралығында OLIMPBET QFL Премьер-лигасының 24-ші тур ойындары өтеді.
26 қазан
«Жетісу» - «Қайрат»
Уақыты: 14:00
Тікелей эфир: Q Football телеарнасы, Q Football мобильді қосымшасы, QFootball.kz пен QFL.KZ сайттары
Өтетін жері: «Жетісу» стадионы (Талдықорған)
Төрешілер: Чеховский Георгий (Астана), Айжігітов Ғалымжан, Ахметов Азамат (екеуі де Қызылорда)
VAR төрешісі: Тевяшов Денис (Орал)
AVAR төрешісі: Сорокопудова Татьяна (Қарағанды)
Қосалқы төреші: Сейдахметов Жаксылық (Талдықорған)
Инспектор: Бақберген Исағали (Шымкент)
Өткен турда «Тұран» қақпасына 5 гол соққан «Қайрат» клубы чемпиондыққа үмітті екендігін дәлелдей білді. Көп соққысын мүлт жіберетін Жоау Пауло да хет-трик авторы атанып, сенімділігін жоғарлатты. Алғашқы айналымда алматылықтар айқын басымдыққа ие болғанымен, сол күйі «Жетісу» қақпасына гол соға алмаған еді. Бірақ осы жолы талдықорғандықтар сапынан қақпашы Арсен Сиукаевтың қатысу-қатыспауы екіталай. Өйткені Қарағандыдағы матчта бірінші таймда алмасқан болатын. Бұл «Жетісу» үшін айтарлықтай кері әсерін тигізуі мүмкін. Алаң иелері айқын аутсайдер болса да, алдын-ала есептен шығаруға болмайды. Осы маусымда Қайрат Нұрдәулетовтың шәкірттері күтпеген жерден «Ақтөбе» мен «Елімайдан» басым түскені бар. «Қайрат» егер чемпиондыққа дәмелі болса, барын салуы тиіс.
«Атырау» - «Елімай»
Уақыты: 16:00
Тікелей эфир: Sport+ Qazaqstan телеарнасы, Q Football мобильді қосымшасы, QFootball.kz пен QFL.KZ сайттары
Өтетін жері: «Мұнайшы» стадионы (Атырау)
Төрешілер: Ноженко Сергей (Талдықорған), Виноградов Денис (Петропавл), Конивец Артем (Қарағанды)
VAR төрешісі: Тасыбаев Айдын (Астана)
AVAR төрешісі: Ткачев Кирилл (Алматы)
Қосалқы төреші: Сұлтанғалиев Руслан (Атырау)
Инспектор: Антонов Виктор (Павлодар)
«Атырау» клубы осы маусымда өз алаңында бір мәрте ғана «Жетісуден» есе жіберді. Қалған матчтарда кім болса да, ұпай алып қалды. Алдағы ойындар ешқандай маңызға ие болмаса да, атыраулықтар оңайлықпен қарсыласқа жол бере қоймайды. «Елімай» маусымдағы басты матчында есе жібергенімен, соңғы турға дейін жүлдегерлер қатарында болуға тырысады. Күнтізбе өте қиын. Бірақ Андрей Карповичтің шәкірттері шешуші сәтте барын салатынына сенеміз. Биыл командалар екі мәрте жолығып, OLIMPBET QFL Премьер-лигада тең тарқасса, 1XBET QFL Лига кубогында «Елімай» 3:0 есебімен басым түскен. Қонақтарға жеңіс ауадай қажет болғанымен, кімнің басым түсетіндігін дөп басып айту өте қиын.
«Ордабасы» - «Жеңіс»
Уақыты: 18:00
Тікелей эфир: Qazsport телеарнасы, Q Football мобильді қосымшасы, QFootball.kz пен QFL.KZ сайттары
Өтетін жері: Қажымұқан Мұңайтпасов атындағы орталық стадион (Шымкент)
Төрешілер: Омаров Рустам (Алматы), Жүсіпов Амангелді (Тараз), Сысоев Антон (Көкшетау)
VAR төрешісі: Гороховодацкий Сергей (Алматы)
AVAR төрешісі: Тергеусізов Самат (Алматы)
Қосалқы төреші: Халилов Мұратбек (Шымкент)
Инспектор: Горда Александр (Көкшетау)
Өткен турда Қостанайда жеңіліске ұшыраған «Ордабасы» чемпиондыққа басты фаворит статусынан айырылды. Алайда әлі де бірінші орын алуға кеш емес. Ол үшін қалған 3 ойында жеңіске жетіп, «Астананың» ұпай жоғалтқанын күтуі тиіс. Шымкенттегі матчта алаң иелері айқын фаворит. Құрамы жағынан бірнеше есе мықты. Бірақ «Жеңістің» де мықтылардың жүйкесін жұқартып жүргенін айтпай кетуге болмас. Соңғы турларда ұпай жинап үлгерген елордалықтар ұтымды сәттерді құр жібермеуге тырысады. Алайда «Жеңіс» сырт алаңда сәтті ойнай алады деп айта алмаймыз. «Ордабасы» тарапынан үздік шабуылшы Жасур Яхшибоев қызыл қағазына байланысты алаңға шықпаса да, өз алаңында ұпай алуы керек.
27 қазан
«Шахтер» - «Қызылжар»
Уақыты: 14:00
Тікелей эфир: Qazsport телеарнасы, Q Football мобильді қосымшасы, QFootball.kz пен QFL.KZ сайттары
Өтетін жері: «Шахтер» стадионы (Қарағанды қ.)
Төрешілер: Сариев Болат (Орал), Тұрсымбаев Тимур (Астана), Мортин Никита (Ақтөбе)
VAR төрешісі: Суликанов Саят (Ақтөбе)
AVAR төрешісі: Жүнісов Нұржан (Астана)
Қосалқы төреші: Бильдинов Михаил (Қарағанды)
Инспектор: Юмашев Эдыген (Астана)
OLIMPBET QFL Премьер-лигадан ресми түрде ұшып кеткен «Шахтер» клубының қалған матчтары өзектілігін жоғалтты. Енді олар көңілсіз күйде маусымды аяқтап, 1XBET QFL Бірінші лигадан қайта көтерілудің амалын жасайды. «Қызылжар» командасы да өткен турда «Атыраумен» жарқын ойын өткізіп, күтпеген жерден 5 голға куә болып едік. Әрине, түрлі эксперименттер, ешқандай қысымның болмауы футболшылардың ашылуына мүмкіндік береді. Бәлкім, Қарағанды қаласы көрермендерге көптеген голдар сыйлап қалар. Бұған дейін Қарағандыда өткен кейінгі бес ойында командалар 2 жеңістен алмасып, 1 рет түскен. Жеңімпаздың кім болатынын да айту қиын.
«Астана» - «Ақтөбе»
Уақыты: 18:00
Тікелей эфир: Qazsport телеарнасы, Q Football мобильді қосымшасы, QFootball.kz пен QFL.KZ сайттары
Өтетін жері: Орталық стадион (Алматы қ.)
Төрешілер: Затула Александр (Өскемен), Бейжанов Рустам (Петропавл), Кольев Евгений (Павлодар)
VAR төрешісі: Кучма Антон (Көкшетау)
AVAR төрешісі: Васютин Сергей (Алматы)
Қосалқы төреші: Сержанұлы Біржан (Алматы)
Инспектор: Сламбеков Қайрат (Алматы)
Осы турдың орталық матчы көп дүниені шешеді. Себебі, жеңілген ұжымның чемпиондықпен қатар, еурокубок аймағына кіру мәселесі де қиындайды. Матчтың Алматының Орталық стадионында өтуінің өзі кездесудің маңыздылығы жоғары екенін аңғартқандай. «Астана» клубы Конференция лигасының жалпы кезеңі аясында сырт алаңда «Нью-Сейнтспен» күш сынасып, араға 64 сағат өткен соң, «Ақтөбемен» кездеспек. Григорий Бабаян үшін қос матчтың шамамен қатар өтуі ойландырарлық дүние. Алайда чемпионатқа басты назарды аударатын елордалықтар біршама мықтыларын ақтөбеліктерге қарсы да алып қалуы мүмкін. Қоржындарында еурокубоктың жолдамасы болса да, қонақтар чемпиондықтан дәмелі екенін ашық мәлімдеген еді. Кімнің мақсаты үстем түседі екен?
«Тұран» - «Қайсар»
Уақыты: 18:00
Тікелей эфир: Q Football телеарнасы, Q Football мобильді қосымшасы, QFootball.kz пен QFL.KZ сайттары
Өтетін жері: «Түркістан Арена» стадионы (Түркістан қ.)
Төрешілер: Байымбет Сәкен (Тараз), Дауанов Ардақ (Алматы), Навроцкий Иван (Астана)
VAR төрешісі: Абдуллаев Бағдат (Қаратау)
AVAR төрешісі: Құмашев Тимур (Астана)
Қосалқы төреші: Орынбаев Илашбек (Түркістан обл.)
Инспектор: Бублинский Николай (Қарағанды)
«Қайсар» клубы өткен турда жасыл алаңда бар шеберліктерін паш етіп, «Шахтерді» ойсырата жеңді. Бұл көрініс қызылордалықтарды фаворит ететіндігі түсінікті. Бірақ қызылордалықтардың сырт алаңдағы кейінгі 5 матчта қарсыласынан басым түсе алмай жатқандығын ескеруіміз керек. «Тұран» командасы Түркістан қаласында жанкүйерлердің көңілін қалдырмауға тырысады. Екінші нөмірде ойнағанымен, олар «Шахтер» мен «Қызылжардан» айласын асыра алды. Ендігі кезекте «Қайсарды» да жеңуге кетәрі емес.
