25-ші тур аңдатпасы: чемпион мерзімінен бұрын анықтала ма?

2-3 қараша күндері OLIMPBET QFL Премьер-лигасының 25-ші тур ойындары өтеді. Орталық матчта «Қайрат» пен «Ордабасы» клубтары кездеседі.

2 қараша

«Қызылжар» - «Қайсар»

Уақыты: 14:00

Тікелей эфир: Q Football телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: «Жастар» стадионы (Петропавл қ.)

Төрешілер: Омаров Рустам, Шабанов Алексей, Арынханов Нұрдәулет (барлығы Алматы)

VAR төрешісі: Чеховский Георгий (Астана)

AVAR төрешісі: Лесив Станислав (Семей)

Қосалқы төреші: Пучков Станислав (Петропавл)

Инспектор: Гриджан Юрий (Алматы)

Қос команданың теке-тіресі жайлы нақты айту қиын. Себебі, клубтардың өзара ойыны үнемі алма-кезек жеңіспен аяқталып жүр. Бірінші айналымда Әли Әлиевтің шәкірттері Қызылордада еш қиындықсыз 0:3 есебімен басым түскенімен, қазіргі сәтте «Қайсар» турнир кестесінде жоғары тұр. Енді қонақтардың ірі есеппен жеңіледі дегеніне сене алмаймыз. Еш қысымсыз өткізіп жатқан клубтар кейінгі екі матчта да ұпай алып келеді. «Қызылжар» үнемі гол соғып жатса, қызылордалықтар сапынан ұлттық құраманың шабуылшысы Айбар Жақсылықовтың ойыны жүріп тұр. Қос команда да голдарымен жанкүйерлерді қуантады деп сенеміз.

«Қайрат» - «Ордабасы»

Уақыты: 16:00

Тікелей эфир: Qazsport телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: Орталық стадион (Алматы қ.)

Төрешілер: Сахи Данияр (Қызылорда), Белоградов Дмитрий (Павлодар), Жақсылық Төребек (Қызылорда)

VAR төрешісі: Затула Александр (Өскемен)

AVAR төрешісі: Филоненко Дмитрий (Тараз)

Қосалқы төреші: Гороховодацкий Сергей (Алматы)

Инспектор: Тусеев Бағдат (Астана)

Екі жыл бойы Премьер-лигада 4-ші орын алып, еурокубоктан тыс қалған «Қайрат» клубы маусымның аяқталуына екі тур қалғанда, жүлдеге және чемпиондыққа өте жақын тұр. Барлығы Рафаэль Уразбахтинның шәкірттерінің қолында. Осы турда басты қарсыласы «Ордабасыны» жеңсе, міндетті түрде кемі күміс жүлде алады. Ал есе жіберсе, барлығы қайта шиеленіседі. Осы маусымды «Қайрат» сапында бастаған Кирилл Кекер енді шымкенттіктер сапында өзінің бұрынғы клубымен жолықпақ. Ол 70 жылдық мерейтойын тойлап жатқан алматылықтарға тосқауыл бола ала ма? Дәл қазіргі сәтте «Ордабасының» да жағдайы мәз емес. Кейінгі екі турда қарсыластарына жол берген ел чемпиондары өз атақтарын қорғаудан үміттерін үзді деуге болады. Қағаз жүзінде «Қайрат» фаворит болғанымен, Талдықорғандағы матчтан кейін 100% жеңеді деу өте қиын.

3 қараша

«Шахтер» - «Ақтөбе»

Уақыты: 14:00

Тікелей эфир: Q Football телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: «Шахтер» стадионы (Қарағанды қ.)

Төрешілер: Нұрмустафина Эльвира (Алматы), Панин Максим (Қостанай), Сәрсенбаев Нұрлан (Алматы)

VAR төрешісі: Ысқақов Марат (Астана)

AVAR төрешісі: Орынбаев Илашбек (Түркістан обл.)

Қосалқы төреші: Бильдинов Михаил (Қарағанды)

Инспектор: Заякин Виктор (Семей)

OLIMPBET QFL Премьер-лигамен қоштасып үлгерген «Шахтер» клубы енді ресми соңғы ойынын «Ақтөбеге» қарсы өткізбек. Командалардың теке-тірестерінде «Ақтөбенің» бағы жанып жүр. Өткен аптада маусымның басты ойынында «Астанадан» есе жіберген ақтөбеліктер чемпиондыққа таластан шығып қалды. Бірақ жүлделі үштікке кіру жағынан әлі де кеш емес. Күнтізбе жағынан да Игорь Леоновтың шәкірттеріне қолайлы болып тұр. Бірақ барлығы «Ордабасының» нәтижесіне де байланысты болмақ. Ең бастысы – еурокубок жолдамасын еншілеген «Ақтөбе» маусымның жоспарын орындап қойды. Қарағандылық «Шахтер» болса, әлі өз ойындарын таба алмады. «Қызылжармен» тең түскенімен, 1 ғана дәл соққысымен тең есепті тіркеді. Оның үстіне толық басымдық «Қызылжар» тарапында болғанын айта кету керек. Ал ақтөбеліктер өз мүмкіндіктерін құр жібермейтіндігін ескерейік.

«Жетісу» - «Атырау»

Уақыты: 16:00

Тікелей эфир: Qazsport телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: «Жетісу» стадионы (Талдықорған)

Төрешілер: Қарабаев Саят (Астана), Бельский Евгений (Тараз), Жүнісов Нұржан (Астана)

VAR төрешісі: Тасыбаев Айдын (Астана)

AVAR төрешісі: Васютин Сергей (Алматы)

Қосалқы төреші: Ноженко Сергей (Талдықорған)

Инспектор: Борисов Александр (Семей) 

«Жетісу» клубын ұпай үлестіруші клуб ретінде санаса да, маусым соңында талдықорғандықтар қарқынды күшейтіп, жүлдеден үмітті ұжымдарға қарсылық көрсетуде. Өткен аптада соңғы минуттарда ғана «Қайраттан» гол өткізіп алды. Бірақ алдағы қарсыласты жеңіс үшін жұлынып тұр деп айта алмаймыз. Командалармен ашық ойын өткізгеннің арқасында алма-кезек голдармен алмасып жүр. Өз алаңында ешкімді аямағанымен, түздегі матчтары сәтсіз аяқталуда. Ал Қайрат Нұрдәулетовтің шәкірттері өз үйіндегі маусымдағы соңғы ойынын өткізетіндіктен, аянып қалмасы белгілі. Алғашқы айналымда капитан Серікжан Мужиковтың керемет орындалған бұрыштамасының арқасында «Жетісу» 0:1 есебімен басым түскен еді. Бұл «Атыраудың» осы маусымдағы өз үйіндегі жалғыз жеңілісі. Енді реванш қайтаруға тырыса ма? Әлде алаң иелері тағы да жеңісті тойлай ма?

«Тұран» - «Жеңіс»

Уақыты: 16:00

Тікелей эфир: Sport+ Qazaqstan телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: «Түркістан Арена» стадионы (Түркістан қ.)

Төрешілер: Суликанов Саят, Тихонюк Юрий (екеуі де Ақтөбе), Калачев Сергей (Атырау)

VAR төрешісі: Московченко Григорий (Павлодар)

AVAR төрешісі: Быстров Дмитрий (Қарағанды)

Қосалқы төреші: Жарылқасынов Самат (Шымкент)

Инспектор: Жуковский Геннадий (Атырау)

Өткен аптада Шымкентке барып, сенсациялық жеңісті тіркеген «Жеңіс» клубы екінші мәрте қатарынан оңтүстік өңірге бет бұрады. «Тұран» клубы өз алаңында есе жібергенімен, «Тобыл» мен «Қайсарға» қарсы лайықты өнер көрсетті. Бірақ қазіргі сәтте елордалықтарды тоқтату кімге болса да қиынға соғып тұр. Келесі маусымға жоғары мақсатты көздейтін «Тұран» ұжымы өз стадионында қалай болса да, лайықты түрде аяқтауға тырысатындықтары анық. 5 матч бойы жеңілістен көз ашпаған түркістандықтар сәтсіздік сериясын тоқтата ала ма екен? Әлде «Жеңіс» чемпионатты 9-шы орынмен аяқтауға тырмыса ма?

«Тобыл» - «Астана» 

Уақыты: 18:00

Тікелей эфир: Qazsport телеарнасы, Q Football мобильді қосымшасы, QFootball.kz пен QFL.KZ сайттары

Өтетін жері: «Тобыл Арена» (Қостанай қ.)

Төрешілер: Сұлтанғалиев Руслан (Атырау), Виноградов Денис (Петропавл), Якбаров Ринат (Семей)

VAR төрешісі: Кучма Антон (Көкшетау)

AVAR төрешісі: Тергеусізов Самат (Алматы)

Қосалқы төреші: Ысқақов Санжар (Қостанай)

Инспектор: Доскеев Нұржан (Алматы) 

«Тобыл» клубының жүлделі орынға кіру мүмкіндігі төмен болса да, мықтыларға қарсы лайықты ойнауда. «Ақтөбе», «Ордабасыны» да жеңген қостанайлықтар енді ел үздігі болып тұрған «Астанаға» тосқауыл болып көрмек. Командалар осы маусымда екі мәрте жолықты. Алғашқы айналымда Станислав Басмановтың соңғы минуттағы голы «Астананы» жеңілістен құтқарса, OLIMPBET QFL Қазақстан кубогының ширек финалында Ислам Чесноковтың жалғыз голы «Тобылды» келесі айналымға өткізді. Ендігі теке-тіресте тең есеп қос ұжымды да қанағаттандырмайды. Егер қонақтар жеңіске жетіп, ал «Қайрат» өз алаңында ұпай жоғалтса, елордалықтар мерзімінен бұрын чемпион атануы мүмкін.