Жаңа кубокқа шайқас: 1ХВЕТ QFL Лига кубогының финалистері шешуші ойынға қалай дайындалуда?
Түркі әлемінің туристік астанасы – Түркістан қаласы биылғы маусымның шешуші ойыны - 1ХВЕТ QFL Лига кубогының финалын қабылдайды. Жаңа кубок үшін елордалық «Жеңіс» пен «Астана» талас жүргізеді. Матч ертең түскі 15:00-де «Түркістан Арена» стадионында өтеді.
Финалдағы жүлде қоры 140 миллион теңгені құрап, жеңімпаз 90 миллион теңгені қанжығасына байлайды. Сондай-ақ кубок иегері рекордтық жалпы жүлде қоры бар турнирге қатысқаны үшін, табысын 129 миллион теңгеге дейін арттыра алады. Осы орайда шешуші ойынның алдында стадионда клубтар ашық жаттығу өткізіп, команданың бас бапкерлері БАҚ өкілдерінің сұрақтарына жауап берді.
«Осы маусымда екі міндетіміз болды. Біріншісі – Премьер-лигада орынымызды сақтап қалу. Екіншісі - 1XBET QFL Лига кубогында барынша алысқа шабу. Турнирдің топтық кезеңінен шыққан соң, одан да үлкен жетістікке жететінімізді сезіндік. Финалға өттік. Енді бізге жеңу ғана қалып тұр», - деді «Жеңіс» клубының бас бапкері Акис Вавалис.
Айта кетейік, елордалық дерби бұған дейін 5 мәрте өтіп, оның төртеуі «Астананың» пайдасына шешіліп, біреуі тең есеппен аяқталған. «Жеңіс» финалға дейін В тобында «Тобыл» мен «Қайсардан» айласын асырып, көш бастаса, жартылай финалда матч соңындағы пенальти сериясы арқылы «Қайраттан» басым түсті. Ал «Астана» D тобында «Каспий» мен «Шахтерді» сенімді жеңсе, жартылай финалда «Елімаймен» пенальти тебісіп, өз пайдаларына шешті.
«Екі елордалық клуб кездесетін қызықты матч. Үлкен мереке деп ойлаймын және біз әдемі футболға иек артамыз. Әрине, жеңіске жетіп, жанкүйерлерді шаттыққа бөлеуге тырысамыз. Әр команда кубокты жеңу үшін, барын салады», - деп «Астана» клубының бас бапкері Григорий Бабаян өз ойымен бөлісті.
Айта кетейік, турнирдің басты серіктесі - 1XBET компаниясы. Финалға кіру тегін. Сонымен қатар, турнирдің бас серіктесі атынан стадионда белсенділік аймақтары, танымал жүргізуші Әділет Бисариевтің интерактиві, диджей, хедлайнер HIRO-дың туындылары мен басты сыйлық - Chery Tiggo 4 Pro автокөлігінің ұтысы күтілуде. Ойынды тікелей эфирде Qazsport телеарнасы, QFootball.kz, QFL.KZ сайттары мен Q Football мобильді қосымшасы арқылы тамашалай аласыздар.
