Мүмкіндігімізді қолдануға тырысамыз – Акис Вавалис финалға дайындық туралы

1XBET QFL Лига кубогының иегері 23 қараша күні «Түркістан Аренада» белгілі болады. Жаңа кубок пен 90 миллион теңгені «Жеңіс» пен «Астана» клубтары сарапқа салады. Акис Вавалис шәкірттері «Тобыл», «Қайсар» және «Қайрат» клубтарын қапы қалдырып, турнирдің бас сенсациясы атанды. Шешуші ойынның қарсанында клубтың бас бапкері QFL.KZ сайтына сұхбат берді.

- Сіз мамырдың ортасында «Жеңіс» клубының бас бапкері болып тағайындалдыңыз, ал дебюттік ойында, 1XBET QFL Лига кубогының алғашқы турында команданыз «Тобылдан» басым түсті. Енді, маусымды дәл осы турнирмен аяқтағалы отырсыз. Финалға дейін жетеміз деп күттіңіздер ме?

- «Жеңіс» клубына келген сәтім 1XBET QFL Лига кубогына тұспа-тұс келіп, чемпионатта ойын уақыты аз бірнеше ойыншыларға мүмкіндік беруді жөн деп шештім. Жартылай финалға шыққан кезде, біз финалға да өте алатынымызды ойлап, сене бастадық.

- Бұған дейін «Жеңіс» клубының бас директоры Айдын Қожахмет біздің сайтқа берген сұхбатында 1XBET QFL Лига кубогын жеңіп алуды қалаймыз деп еді. Сіздер осы маусымда «Астанамен» 3 мәрте жолығып, 2 жеңіліс және 1 рет тең түскендеріңізді де ескерейік. Финалдағы қарсыластарыңыз жайлы не айта аласыз? Турнирде чемпион атану үшін сіздерде қандай басымдық бар деп есептейсіз?

- Әрине, «Астана» - үлкен клуб. Біз үлкен жауапкершілікпен қараймыз. Қос команданың бюджеті жағынан айтарлықтай айырмашылығы болса да, чемпионат аясында өткен кейінгі матчта бәсекелесе алатындығымызды көрсете білдік. «Астана» - менің ойымша, фаворит. Сондықтан олар қосымша қысымды сезінеді. Біз өз кезегімізде соңына дейін ойнап, мүмкіндігімізді қолдануға тырысамыз.

- 1XBET QFL Лига кубогының финалын «Түркістан Арена» қабылдайды. 10 күн бұрын сіздер дәл сол жасыл алаңда доп теуіп едіңіздер. Алаңның сапасын қалай бағалайсыздар? Финалға дейін 2 аптадай үзіліс болатынын ескеріп, осы аралықта футболшылардың физикалық дайындығын қалай ұстауға тырысасыздар?

- «Түркістан Аренаны» көргенде таңғалдым. Бұл заманауи әрі ойыншыларға қолайлы стадион. Табиғи төсеніштің де жағдайы керемет. Бұл стадионда доп тебудің өзі қосымша мотивация береді. Физикалық дайындық бойынша, ешқандай ерекше әдісіміз жоқ. Жаттығуымызды күнделікті режимде жалғастыра береміз.

- Бас бапкер ретінде тағайындалғалы бері алдыңызға қандай міндет қойылды? Жоспар орындалды ма? Қазақстан футболы жайлы ойыңызбен бөліссеңіз?

- Нақты міндет – команданың жоғары дивизионда орнын сақтап қалуы болды. Өздеріңіз білетіндей, біз өз футболымызды ойнап, міндетті орындай алдық. Қазақстан футболы жайлы айтатын болсам, көбінесе физикалық басымдылыққа мән беріледі. Әйтсе де, чемпионаттың деңгейі жоғары.

- Жалпы осы жылы басталған 1XBET QFL Лига кубогы туралы ойыңыз қалай?

- Менің пікірімше, командалар үшін бұл пайдалы турнир. Бәсеке алғаш рет ұйымдастырылып жатса да, жоғары деңгейде деп есептеймін.

Айта кетейік, «Жеңіс» пен «Астана» арасындағы 1XBET QFL Лига кубогының финалы 23 қараша күні сағат 15:00-де «Түркістан Арена» стадионында өтеді. Матчқа кіру тегін, ал бас серіктес атынан жанкүйерлерді автокөлік ұтысы және арнайы ойын-сауық бағдардамасы күтуде. Ойынды тікелей эфирде Qazsport телеарнасы, QFootball.kz, QFL.KZ сайттары және Q Football мобильді қосымшасы ұсынады.