Бірінші лиганың 18-турының үздіктер құрамасы

Қазақстан Кәсіпқой футбол лигасы Бірінші лига командалары арасында Қазақстан Республикасының Біріншілігінің он сегізінші турының үздіктер құрамасын назарларыңызға ұсынады:

Құрама ҚКФЛ серіктесі InStat компаниясының ойындарды сараптау көрсеткіштерінің негізінде құрылған.

Турдың бір ойыны қалғандарынан екі аптадан кейін өткен еді. Үздік он бір ойыншы біздің назарымыздан тыс қалмады:

Қақпашы: Жандар Жанғалиев, «Мақтарал»

«Мақтарал» қақпашысы Жандар Жанғалиев «Қайрат А» командасына қарсы жақсы ойын көрсетті. 19 жастағы қақпашы үш рет қақпадан шығып, сәтті ойнады. Алматылықтардың төрт соққысын қайтарды. Екі рет қиын сәтте қақпасын құтқарып қалды. Ойын индексі – 239.

Сол жақ қорғаушы: Мейіржан Кәмбіл, «Мақтарал»

«Мақтарал» қорғанысында жас футболшы Мейіржан Кәмбілдің ойынын атап өткен жөн. Сол жақ қорғаушы қарсыластың пасын 11 рет тоқтатып, қарсыластың айып алаңына 5 рет пас шығарды. Пастарының дәлдігі – 86 пайыз. Ойын индексі – 216.

Орталық қорғаушылар: Қанат Әшірбай, «Қыран»; Берік Айтбаев, «Тараз»

Қанат Әшірбай қорғаныстағы тікелей міндеттерін толық атқарып, «Каспий» қақпасына гол соғуға да уақыт тапты. Әуедегі допқа таласта 12 рет, жердегі допқа таласта 17 рет жеңіске жетті. Пастарының дәлдігі 87 пайызды құрады. Ойын индексі – 247.

Ақтөбеде өткен ойында Берік Айтбаев қорғаныста қателеспеді. «Тараздың» негізгі қорғаушысының пас беру көрсеткіші де жоғары – 91 пайыз. Ойын индексі – 247.

Оң жақ қорғаушы: Асылбек Қанат, «Қыран»

«Каспиймен» өткен ойында жас қыран Асылбек Қанат қарсыластың оң қапталдан төндірген шабуылдарының барлығын тойтарды. 19 жастағы футболгы допқа таластың барлығында жеңіске жетті. Пастарының дәлдігі де жоғары – 86 пайыз. Ойын индексі – 244.

Орталық қорғаушылар: Артем Касьянов, «Оқжетпес»; Демият Сламбеков «Жетісу Б»

Артем Касьяновтың үздіктер құрамасына енгенін Теміртауда кездесу тағдырын шешкен, алыстан қақпаға тура бағытталған соққысымен айқындауға болады. Сонымен қатар, көкшетаулықтардың жартылай қорғаушысы қарсыластың 8 пасын тоқтатты. Пастарының дәлдігі – 88 пайыз. Ойын индексі – 248.

Демият Сламбеков орталық алаңды толықтай бақылауда ұстады. Қарсыластың 6 пасын тоқтатып, әуедегі допқа таласта 3 рет жеңіске жетті. Допқа таласу көрсеткіші – 69 пайыз. Сонымен қатар, нәтижелі пастың авторы атанды. Ойын индексі – 261.

Сол жақ қорғаушы: Асхат Балтабеков, «Жетісу Б»

Асхат Балтабеков сол қаптал арқылы қарсыластың қорғанысын мазалады. Жартылай қорғаушы бес рет қарсыласын алдап өтіп, төрт рет шешуші пас шығарды. Пастарының дәлдігі – 76 пайыз. Ойын индексі – 245.

Оң жақ жартылай қорғаушы: Алибобо Рахматуллаев, «Қыран»

Турдың ең үздік ойыншысының атағын Алибобо Рахматуллаев иемденді. Ол нәтижелі пас беріп, пенальтиден жеңіс голын соқты. Өзбек легионері 8 рет қарсыласын алдап, 6 рет қарсыластың айып алаңына пас шығарды. Ойын индексі – 268.

Шабуылдаушы жартылай қорғаушы: Әділет Талғатов, «Жетісу Б»

21 жастағы Әділет Талғатов жетісулықтардың шабуылын басқарды. Оның ойыны жүріп, екі рет нәтижелі пас шығарды. Үш рет дриблинг қолданып, 81 пайыз тура пас тастады. Ойын индексі – 265.

Шабуылшы: Әлішер Сүлей, «Тараз»

Турдың кейінге қалдырылған ойынында Әлішер Сүлей алдымен пенальтиді мүлтіксіз орындап, артынша тура соққысымен екінші голын соқты. Шабуылшының пас беру көрсеткіші де өте жоғары – 94 пайыз. Ойын индексі – 253.