Бірінші лиганың бесінші турының үздіктер құрамасы

30 сәуір 2018 23:22

Қазақстан Кәсіпқой футбол лигасы Бірінші лига командалары арасында Қазақстан Республикасының Біріншілігінің бесінші турының үздіктер құрамасын назарларыңызға ұсынады:

Құрама ҚКФЛ серіктесі InStat компаниясының ойындарды сараптау көрсеткіштерінің негізінде құрылған.

Үздік он бір ойыншының тізімі келесідей:

Қақпашы: Данил Подымский, «Алтай»;

Үздіктер құрамасының қақпадағы орнын маусым басында «Алтайдың» қатарын толықтырған 19 жастағы Данил Подымский алды. Өткен турда жас қақпашы бірде бір қателік жібермеді. Екі рет соққы қайтарып, бір сейв жасады. Қақпадан шығып ойнау көрсеткіші де 100 пайыз. Ойын индексі – 242.

Сол жақ қорғаушы: Бауыржан Тәңірбергенов, «Алтай»;

Бауыржан Тәңірбергенов қорғаныста мінсіз ойнап, шабуылға да үлгеріп отырды. Допқа таластың 69 пайызында жеңіске жетті. Қарсыластан допты төрт рет тартып алып, қарсыластың пасын 10 рет қағып әкетті. Екі рет қарсыласын алдап өтіп, үш рет өткір пас берді. Ойын индексі – 255.

Орталық қорғаушылар: Әнуар Омашев, «Алтай»; Владимир Седельников, «Қыран»;

«Байқоңырмен» өткен ойында Әнуар Омашев сауатты әрі сенімді ойнады. Жас центрбек екі рет допқа таласып, жеңімпаз атанды. Қарсыластың пасын 10 рет жарты жолдан қайтарды. Сонымен тартыстың 81 пайызында жеңіске жетті. Ойын индексі – 223.

«Қыран» қорғанысындағы үздік ойыншылардың бірі Владимир Седельников үлгілі ойын көрсетті. Ол қарсыластың шабуылды жүзеге асыруына ешқандай мүмкіндік бермеді. Бес рет (100 пайыз) допты таза тартып алды. Допқа талас көрсеткіші – 91 пайыз. Сонымен қатар, қорғаушы алғашқы пасымен өз командасының шабуылын бастап отырды. Пастарының дәлдігі – 82 пайыз. Ойын индексі – 226.

Оң жақ қорғаушы: Фархадбек Ирисметов, «Алтай»;

Өткен турда «Алтай» сапында тәжірибелі Фархадбек Ирисметов жақсы ойын көрсетті. Команда капитанының берген пастарының дәлдігі 75 пайызды құрады. Допқа талас көрсеткіші – 64 пайыз. Ойын индексі – 202.

Орталық жартылай қорғаушы: Артем Касьянов, «Оқжетпес»;

«Оқжетпестің» орталық алаңдағы ойынын жүргізген ойыншы - Артем Касьянов. Украиналық футболшының берген 96 пасының 81-і көздеген жеріне жетті. Бұл турдағы ең жоғары көрсеткіш. Сонымен қатар, жартылай қорғаушы бір голдың авторы атанды. Ойын индексі – 239.

Сол жақ жартылай қорғаушы: Мақсат Тайкенов, «Каспий»;

Теміртауда өткен ойында «Каспий» сол қапталмен жиі шабуыл ұйымдастырды. Осы шабуылдардың барлығы Мақсат Тайкенов арқылы жүзеге асты. Оның қақпаға бағыттаған үш соққысының біреуі өз мақсатына жетті. Пастарының дәлдігі – 82 пайыз. Бес рет қарсыласын алдап өтті. Ойын индексі – 234.

Оң жақ жартылай қорғаушы: Алтынбек Төлеев, «Алтай»;

«Байқоңырмен» өткен ойында Шығыс Қазақстан өңірі командасының негізгі ойыншыларының біріне айналған Алтынбек Төлеев бір гол соғып, бір нәтижелі пас жасады. Пастарының дәлдігі – 78 пайыз. Ойын индексі – 230.

Шабуылдаушы жартылай қорғаушы: Тимур Оспанов, «Шахтер-Болат»;

«Болаттықтар» сапында Тимур Оспанов ойын тізгінін қолына алды. Оның пастарының дәлдігі 83 пайызды құрады. Бір рет нәтижелі пас қалдырды. Тимур Оспановтың еңбегінің арқасында «Шахтер-Болат» маусымдағы алғашқы жеңісіне жетті. Ойын индексі – 225.

Шабуылшы: Алексей Шакин, «Алтай»; Дәурен Қайқыбасов, «Алтай»;

Алексей Шакин тағы да тамаша ойнады. Тәжірибелі ойыншы шабуылда бірнеше рет комбинация ұйымдастырып, жақсы статистикалық көрсеткішке ие болды. Екі нәтижелі пастың авторы атанды. Ойын индексі – 242.

«Алтайдың» жеңісі Дәурен Қайқыбасовтың елеулі еңбегінсіз елестету мүмкін емес. Форвард күтпеген жерден қарсыластың қақпасына қауіп төндіріп, екі рет мергендік танытты. 22 жастағы шабуылшы турдың ең үздік ойыншысы атағын де иемденіп кетті. Ойын индексі – 281.