Кәсіпқой футбол лигасының президенті болып Олжас Абраев сайланды

10 тамыз күні Астанада өткен Кәсіпқой футбол лигасының кеңесінің қорытындысы бойынша ұйымның жаңа басшысы сайланды. Қазақстандағы барлық кәсіби клубтың өкілдері ҚКФЛ президенті қызметіне үміткер ретінде Қазақстан футбол федерациясының вице-президенті Олжас Абраевқа дауыс берді.

 

Кәсіпқой футбол лигасының бұрынғы жетекшісі Бағлан Ергешев ҚФФ Атқарушы комитетінің отырысында Қазақстан футбол федерациясының бірінші вице-президенті қызметіне тағайындалды. Осыған байланысты Бағлан Қожабайұлы Кәсіпқой футбол лигасы төрағасы қызметінен отставкаға кетті. Футбол клубтарының жетекшілері бұл шешімді толық қабылдады.

 

Кәсіпқой футбол лигасын басқаруда Олжас Абраевтың тәжірибесі мол. Ол ұзақ жылдар бойы ҰФЛ төрағасының орынбасары қызметін атқарды, ал 2014 жылы КФЛ төрағасы болды.

 

Жаңа қызметке тағайындалғаннан кейін Олжас Абраев алдағы уақытта атқарылатын міндеттерге тоқталып өтті. Ең алдымен «Қазақстан Кәсіпқой футбол лигасы» Заңды тұлғалар бірлестігі құрылады. Бұл ұйымға еліміздің барлық кәсіби клубтары мүше болады.

 

«Бұл жол арқылы Еуропада кәсіби футбол дамып келеді. Біздің лиганың да тәуелсіз жолға түсетін уақыты келді. Кәсіби клубтар арасында жарыс өткізу, кәсіби футболды басқару өкілеттігі беріледі. КФЛ 2012 жылы футболды басқару мен жарыстарға қатысуда клубтарға кең мүмкіндік беру мақсатында құрылған еді. Сол уақыттан бері футболдың сапасы айтарлықтай өсті. Қарағандылық  «Шахтер» 2013/2014 жылғы маусымда Еуропа Лигасының топтық кезеңінде ойнады. Осы маусымда «Астана» мен «Қайрат» та Чемпиондар Лигасы мен Еуропа Лигасының топтық кезеңіне бір қадам тұр. Тәуелсіз лига құру елімізде футболды дамытуда келесі маңызды қадам болмақ. Ұйымның мүшелері кәсіпқой футболды дамыту жолдарын бірге қарастырады. Бұл арқылы барлығы ұтады. Клубтар футболды басқару процесіне ықпал етуге мүмкіндік алады. Қазақстан чемпионаты күшейе түсіп, Ұлттық құрама мықты футболшыларға ие болады. Ал, жанкүйерлер тартысты футболдың куәсі болмақ», – деп атап өтті Олжас Абраев.

 

Сонымен қатар, ҚКФЛ-ның жаңа басшысы ұйымның Еуропалық кәсіби футбол лигаларының қауымдастығына мүше болуы басым бағыттың бірі екеніне тоқталды. Шетелдік әріптестермен тығыз қарым-қатынас орнату және тәжірибе алмасу Қазақстан футболы үшін пайдалы болмақ және Қазақстан Премьер-лигасы мен Бірінші лигасын жаңа дәрежеге көтеруге мүмкіндік береді.

 

«Өзге елдердің тәжірибесіне жүгіну қажет. 2014 жылы КФЛ шетелдік әріптестермен байланыс орнатып, Ресей лигаларымен әріптестік жөнінде меморандумға қол қойылды. Әріптестеріміздің көптеген бағыт бойынша жұмыстары бізге қызықты. Оның ішінде - телеарнамен жұмыс, маркетинг, жанкүйерлермен жұмыс, лига мен оның мүшелерінің имиджін көтеру. Біз осы бағытта қызметті жалғастыруды көздейміз. Тек қана Ресей емес, өзге елдермен қарым-қатынас орнатамыз».