Руслан Болов - 2022 жылғы маусымның Бірінші лиганың үздік шабуылшысы!

Қазақстанның кәсіпқой футбол лигасы бірнеше номинациялар бойынша 2022 жылғы маусымның үздік ойыншыларын анықтау мақсатында Бірінші лиганың бас бапкерлері мен команда капитандары арасында сауалнама өткізді.

Сауалнама қорытындысы бойынша көкшетаулық «Оқжетпестің» ойыншысы Руслан Болов Біріншіліктің үздік шабуылшысы атанды. Дауыстарды қосқаннан кейін Болов 69 ұпайға ие болды. 28-жасар ресейлік шабуылшы 24 гол соғып, маусым қорытындысы бойынша Бірінші Лиганың үздік сұрмергені атанды. Сонымен қатар, Боловтың еншісінде 9 нәтижелі пас бар.

32 ұпаймен «Жетісу» командасының шабуылшысы Бауыржан Тұрысбек үздіктер тізімінде екінші орынға ие болды. Қазақстандық футболшы талдықорғандық клуб сапында 19 ойында 16 гол соқты.

Үшінші орынды 30 ұпай жинаған «Қайсардың» африкалық легионері Адама Диалло иеленді. Диалло соғылған 19 голмен Бірінші Лига сұрмергендерінің тізімінде екінші орынға ие болды.